電動車續航力謎思 Leave a comment
* 本文章純屬個人見解 *
相信好多人決定買電動車前，都會考慮電動車既續航力。尤其係當自己屋企或公司停車場無得叉電時，長續航力就成為一個好重要既因素。到底官方文宣上既續航力資訊應該如何解讀？
我地喺分析前先了解唔同續航力既計算方法：
NEDC (New European Driving Cycle)
測試包含了五個工況：四個市區循環同一個郊區循環（模擬），當中市區循環車速較低，郊區循環車速較高。實際上只係將車輛放喺滾筒台架上進行測試，利用帶有電機既滾筒黎模擬不同工況下既阻力，以及喺車頭前放置一部鼓風機黎模擬同當前車速相符既氣流。
但係喺測試既過程中，行車以外既負載例如冷氣、大燈、加熱座椅等都會關閉，而且測試過程中針對市區工況時會以時速唔超過 50km/h 進行，平均時速只有 18.5km/h。巿區工況測試時間大概係 195 秒。而喺郊區工況就會假設交通處於暢通既狀態，時速最高達到120km/h，平均時速為 62km/h，測試時間 400 秒左右。
WLTP (World Light Vehicle Test Procedure)
測試分為低速、中速、高速與超高速四部份，四部份對應既持續時間為 589s、433s、455s、323s，而對應既最高速度分別為 56.5km/h、76.6km、97.4km、131.3km/h。
WLTP 整體都比 NEDC 嚴格。除咗測試時間比較長，亦會測試加速度、剎車等情況，更將車輛既滾動阻力、擋位、車重（貨物、乘客）、功耗等都納入測試裡面。因此，呢個數據通常比較接近實際續航距離。
EPA (Environmental Protection Agency)
測試相比以上兩個測試時間更長、距離更長、速度更高、速度變換更多，而且將環境溫度等對能耗既影響加入考慮，所以測試結果亦都相對上比較準確。現時主要為美加使用。
CATC (China Automotive Test Cycle)
具中國特色的 NEDC，此處不深入探討。目前中國 Tesla 以 GB/T 18386-2017 NEDC 測試結果作為續航里程標準。
例子
我地以 Model 3 Standard Range Plus 作例子做個分析。
NEDC: 508 km (Tesla 似乎已不再使用)(資料來源)
WLTP: 448 km (全球大部份地區正在使用，包括香港)
EPA: 423 km (美加使用)
好多人講話官方公佈既續航力不可信，我地不時聽到啲人話「打個七折就差唔多啦」，到底點解會有咁既理解？
我地一齊粗略計吓：
假設用返我地最熟悉既 WLTP 作計算，Standard Range Plus 可以行到 409 km (美制 Panasonic NCA 電池版本) / 448 km (中制寧德時代 LFP 電池版本)。聽落都唔錯，但唔好唔記得上文提到，呢組數字既計算方法係喺特定條件下計算出，而且數值係以 0% – 100% 既可用里程計算，同實際使用習慣有一定程度出入。上述數字打個七折後就 286km / 313km，加上通常我地架車只會充到 80% – 90% (廠方建議 LFP 電池版本 SR+ 可叉到 100%)，以此推斷扣減之下，實際可用電量可能只係得返 60% (172 / 188 km) 至 80% (229 / 251 km) 左右。唔好唔記得你仲會開冷氣、聽音樂、開燈等等，其實都消耗緊你部車既電池。
如果你覺得我既假設係 Bullshit 既話，就等我分享一個實際例子。小編經常喺九龍區出沒，燈位比較多，較少行 Highway。有時接人會停低架車喺車內涼吓冷氣、常用 Supercharger、19 吋輪圈、平均每公里耗電量為 150 – 165 Wh/km。試過做一次測試，Standard Range Plus (美制) 由 98% 用到得返 2%，只係行到 220 km 左右。
其實電動車同汽油車一樣，越大腳、越停得多、越多斜路就自然越耗電。甚至如果換咗鈴、呔都會影響續航力。我以上既例子可能好多車友會質疑係我渣得大腳或者係我有問題，我亦都同意可能我平常行駛既路段可能比較多停頓及行駛緩慢。可能我既例子比較極端，但我只係希望帶出一個期望值，唔好拎住 4xx km 呢個續航力去作太多幻想。我亦聽過有車友部 Standard Range Plus 100% 用到 20% 可以行到 280 甚至 300 km 甚至更多，視乎返你渣得有幾溫柔、係唔係全程行高速啦。始終香港路況同歐美地區截然不同，喺外國行到 300km 並唔代表喺香港都可以做得返同樣成績。
小編喺 K11 Musea 有親耳聽過 Tesla 既 Sales 宣稱 SR+ 肯定行到 300 km+，真係令人哭笑不得。我 220 km 既例子同官方數字雖然唔係用同一把尺去做對比，但係呢個係日常使用既實例。電動車使用習慣同汽油車唔同，唔會吓吓打爆油缸，亦唔會著油燈先去入油。其實駕駛電動車既使用習慣同油車唔一樣，廠方亦建議車主們一有機會就補充電力，而唔係渣到無電先至去充電。
寫呢篇文章，係希望各位唔好拎住官方網站公佈既數字作太多遐想。好多車主/準車主喺購買汽油車時未必十分注重每缸油行到幾多公里，但買電動車時大家都比較關注佢既續航力。希望用真實（可能係極端）既例子可以話畀大家聽理想與現實既分別，令各位買電動車前應先有定心理準備。
如果你係現有車主，而你實際可行里數同官方公佈數字貼近的話，恭喜你成功練成好腳法！
