香港 Tesla 沒有的十個功能 1

Tesla 除咗係一間電動車公司、能源公司之外，好多人都會將佢歸類為一間科技公司。除咗佢既電池技術十分成熟之外，好多人買 Tesla 電動車既原因都係被佢既科技吸引。雖然 Tesla 有好多新穎既功能，但無奈受香港法例所限，好多功能至今仍然未喺香港既車上開放。以下將整理十個香港被閹割既功能，未買車既人請唔好對以下功能有任何期望。

行事曆 Calendar

早期香港既 Model S 仍然可以用到完整行事曆功能。車主可以將手機行事曆同步至中控屏幕上，每日第一次上車時會自動彈出，提示全日行程。車主亦可以直接選擇行程上既地址直接導航至目的地。此外，如果開啟咗自動導航功能，更會喺每次上車前自動導航去下一個喺行事曆中設定好既目的地。功能於 2016 年中一次更新後被移除。

瀏覽器 Browser

Tesla 咁大個中控屏幕，加上 3G/4G 連線功能，當然可以用黎上網啦！Model S/X 既 MCU1 配備功能十分有限既 WebKit-based 瀏覽器，連影片都播唔到。小編實測，上個 Facebook 都要用成十分鐘⋯⋯ MCU2 則轉用 Chromium-based 既瀏覽器，除咗比之前流暢好多次外，仲可以播到片！

有好多海外車主特登寫咗一啲 Web-apps 專係畀 Tesla 使用，例如可以顯示多個 Widgets、國際時間、計數機等。亦有好多 web-based 既遊戲可以喺上面玩到。此外，更有開發者寫咗啲軟件，畀你將手機介面 Mirror 上去車上，功能十分豐富。

音箱 Boombox

2021 年起，香港既 Model 3/Y 倒車時多咗啲嗚嗚聲。呢個 pedestrian warning sound 其實係一個新既外放喇叭發出。有個外放喇叭當然唔好浪費啦！可以喺 camping 時攞黎播音樂，又可以將響咹聲轉成其他聲效，停車時又可以扮吓雪糕車⋯⋯ 好過癮！不過 NHTSA 話有安全隱憂，所以 2022 年 1 月 Tesla 推送咗一個更新，禁止行車時使用呢個功能。

劇場 Theater

正如上面所講，MCU2 或以上既瀏覽器支援影片播放，不過就唔係全屏幕既。Theater mode 就將幾個平時比較常用既平台變成全屏模式。每個國家/地區既列表都唔太一樣，例如有 YouTube、Netflix、hulu、Twitch 等。如果 Supercharge 同 Car Camping 有得睇片真係一大享受！

卡啦OK Caraoke

Caraoke 故名思義就係可以喺車上唱 K。唔同地區既 Caraoke 模式都有少少唔一樣。大部份地區都會有一個獨立既媒體選單，入面所有既歌曲都附有歌詞，而且會 highlight 住佢唱緊嗰一段。2022 年 2 月，中國同雷石 KTV 合作，推出獨家既 Caraoke 功能，可以配合 Teslamic 使用，真正將部車變成流動 K 房。

遊戲廳 Arcade

Tesla 既 Autopilot 電腦內置一粒咁強勁既 GPU，當然唔可以浪費啦！用黎打機就啱哂！除咗用屏幕控制遊戲之外，更可以用軚盤、外接手制去打機！當中有好多經典又好玩既遊戲，叉電打機一流呀！以下節錄部份預載於 Tesla (MCU2+) 上既遊戲：

• Beach Buggy Racing 2
• Cat Quest
• Cuphead
• Cyberpunk 2077
• Fallout Shelter
• Missile Command
• Stardew Valley
• Super Breakout
• The Battle of Polytopia
• The Witcher 3

召喚 Summon

Summon 可以比車主利用車匙或手機 APP 遙控將車輛前後移動一定距離，遇到障礙物、輕按把手等都會自動停低。香港既停車位咁窄，其實十分需要呢個功能！

智慧召喚 Smart Summon

Smart Summon 比起 Summon 當然更聰明啦！除咗識自動行直線之外，更加識得由停車位渣一段距離去到車主面前，方便上車。外國有車主試過喺一個滿佈水氹既露天停車場將愛車召喚到面前，真係羨煞旁人呀！不過香港咁多室內停車場，其實作用又未必真係咁大。

實時鏡頭 Sentry Mode Live Camera

一句講哂 – 防抄牌神器！停低架車之後可以隨時用手機 APP 連接自動架車睇到實時前後左右四個鏡頭既即時映像，無得輸呀！呢個功能暫時只在美洲及歐洲推出。Tesla 正式於 2022.36 版本將功能推送至亞洲巿場，香港、台灣、澳洲等地既 Model 3 / Model Y 都可以用到呢個功能啦！

全自動駕駛 Full-self Driving

Tesla 喺北美已經開始推送測試版既全自動駕駛畀車主，只要車主有良好既 Safety Score，就可以試用 FSD。除咗全自動駕駛既能力之外，亦支援辨認紅綠燈、Stop Sign 及路面標示功能。

咁多個功能，你最想要邊個？

雖然香港路面未必適合，加上相對保守既法例令以上功能喺短期內都未必會喺香港開放，但你最想要咩功能？歡迎一齊留言討論！