同家用插蘇一樣，唔同國家既電動車充電都有自己既標準。經過多年既改良及進步，現時電動車充電主要分為兩大類別、四套標準。對電既認識較淺既朋友，可以先閱讀 五分鐘學識計算充電效能及收費 。
直流 (DC) 定交流 (AC)？
就算中學無讀物理都好，有睇過 “The Current War” (電流戰爭) 既朋友，應該都會對呢兩個 Terms 唔會陌生。故仔唔多講，有興趣了解兩者既分別可以睇吓以上呢套戲。簡單黎講，我地日常用既電力傳輸系統都係採用交流電 (Alternating Current) ，因為損耗較低，傳輸成本亦都因此較低。
至於電動車充電，普遍將 DC 歸類為快充，AC 歸類為中充/慢充。有少部份充電機及電動車亦支援 AC 快充，不過由於 Tesla 電動車並不支援，所以我地在此省略。
四大充電標準
由於各國車廠推行電動車初期並未有劃一標準，衍生出唔同國家自行訂立咗唔同標準。目前主流共有歐洲、北美、中國、日本四大標準。
上圖可見，各國既充電標準分別有 AC 及 DC 兩款，唯獨是最右邊有一個 Tesla 係 AC DC 通吃。不過咁多位香港既 Tesla 車主又好似未用過呢個插頭咁，到底呢個插頭係咩新鮮蘿蔔皮？
Tesla Proprietary Connector (TPC)，係由 Tesla 開發既一個充電標準接頭。當年由於充電標準尚未成熟，Tesla 自行開發出一個插頭輕巧細小，既能支援 DC 亦可支援 AC 既多用途標準，最高可支援 250kW。呢個充電標準目前喺美國、加拿大、韓國、日本既 Tesla 上使用。台灣 Tesla 原本亦都係少數採用 TPC 既地區，但 Tesla 台灣宣佈由 2021 年 7 月開始，全面改用 CCS 2 歐洲制式，使台灣目前有兩種充電制式既 Tesla 喺路上行走。
中國喺 2015 年公佈 GB/T 2015 標準 (新國標)，為直流及交流電定立一個基本上只有中國電動車會用既標準。佢既交流電標準基本上就係一個公母調轉既 Type 2 (歐洲標準)，而直流標準就近似一個扭咗少少既 ChaDeMo (日本標準)。中國既 Model 3/Y 配備兩個充電設計，並設有防呆設計，防止同時插入 AC / DC 兩枝充電槍。
值得一提既係，由於舊版 Model S/X 個充電口太細，喺中國銷售既 Model S/X 係廢咗原本既充電口位置，額外加咗個 “油缸蓋” 畀架車。
至於香港常用既充電插頭，其實就係跟隨歐洲標準既 Type 2 / CCS 2。整個充電插座分為兩個部份，上半部份為 IEC 62196 標準既 Type 2 交流充電插座，下半部份則為 DC 電源輸入既部份，充電時要連同上半部份一同使用，稱為 Combined Charging System 2 (CCS 2)。
不同型號既 Tesla 支援不同既充電速度，由於各國電壓有異，以下峰值只適用於香港，未必適用於其他地區：
| AC 充電峰值 | DC 充電峰值 | |
| Model S (2012-2016/03) – 沒有配備 Dual Charger | 11 kW (3P 16A) | 145kW |
| Model S (2012-2016/03) – 配備 Dual Charger | 21 kW (3P 32A) | 145kW |
| Model S (2016/04 – 2020) – 沒有配備 High Amp Charger | 11 kW (3P 16A) | 145kW |
| Model S (2016/04 – 2019/04) – 配備 High Amp Charger | 16 kW (3P 24A) | 145kW |
| Model S (2019/05 – 2020) – Raven | 16 kW (3P 24A) | 225kW |
| Model X (2015-2020) – 沒有配備 High Amp Charger | 11 kW (3P 16A) | 145kW |
| Model X (2015-2019/04) – 配備 High Amp Charger | 16 kW (3P 24A) | 145kW |
| Model X (2019/05-2020) – Raven | 16 kW (3P 24A) | 225kW |
| Model 3 | 11 kW (3P 16A) | Standard Range: 170kW Long Range: 250kW |
| Model Y | 11 kW (3P 16A) | 250kW |
目前除歐洲以外，香港、台灣、新加坡、澳洲、紐西蘭等地區新既 Tesla 都配備呢款 CCS 2 充電插座。
除以上幾種之外，香港車主見得比較多既會係 Model S/X 上既插座。雖然佢望落似係一個 Type 2，其實佢暗藏玄機。圖中可見，最中心個位有一個倒水滴型，而且頂端亦有一個凹槽。其實呢個係 Tesla 自行定制既 Modified Type 2 (由於我搵咗一輪都唔知叫咩名，暫且叫佢做 Type 2 DC 先）。呢個插座同時支援普通 AC 輸入，亦可以支援 Tesla Supercharger 上面既 DC 快充。由於呢個獨特既形狀，Supercharger 條線係插唔到入其他電動車既 Type 2 插座上架！
四種充電模式
充電插頭/插座可以分為三個部份：車端、牆端及線端。唔同模式之下，有啲充電機會自帶充電線，有啲就要自備。原來除咗直流同交流之外，充電都有分四個模式 (Mode)，以下將會逐一講解：
Mode 1: 牆身 AC 插座直駁輸入電動車
電流會直接經電線輸入電動車。由於缺乏安全機制，好多國家都禁止呢款充電設計，而家只有少部份電動單車、電動滑板車等採用呢個設計。
Mode 2: 牆身 AC 經控制器輸入電動車
我地常用既 Tesla UMC 就屬於 Mode 2 充電。充電線中間有部機仔（控制器），係用黎保護牆端電力系統及車端既電源管理系統。充電線既牆端可以係家用插頭 (例如香港常用既英規 13A) 或工業插頭 (例如藍頭 單相16/32A 及 紅頭 三相16/32A)。更多 UMC 相關資料，可以閱讀 Tesla UMC 一代同二代到底有咩唔同?
Mode 3: AC 直入牆身控制器，再經充電線輸入電動車
Mode 3 同 Mode 2 都有一個控制器，不過 Mode 3 既控制器有一個條件，就係要永久性地接駁電源 (而 Mode 2 係可隨時插拔既家用插頭/工業插頭)。通常我地常用既中電、港燈或其他中速充電都係呢個類別。
Mode 4: AC 直入牆身控制器，轉換成 DC 後再經充電線輸入電動車
此仍唯一一個直流充電方式，Tesla Supercharger 就係屬於呢一類。充電器通常都比較大，負責進行電流轉換，充電器成本亦比交流充電貴好多，當然好處係充電速度比交流電快得多。
| 模式 | 自備充電線 |
| Mode 1 | 需要 |
| Mode 2 | 需要 |
| Mode 3 | 兩者皆可 |
| Mode 4 | 不需要 |
我部車係歐標 CCS 2，可唔可以用到其他標準既充電槍？
簡單而言，交流電比較容易，直流電比較難做到轉接器。以下將列出一啲香港比較常用既充電線材/轉接器。
| 模式 | 車端 | 牆端 | 線端 | 電流 | 用途 | 相關產品 |
| Mode 2 | Type 2 | Type G 1P13A | / | 交流 | 英規家用插座 (自備充電線) | Duosida |
| Mode 2 | Type 2 | Blue CEE 1P16A | / | 交流 | 工業插座 (自備充電線) | Duosida |
| Mode 2 | Type 2 | Blue CEE 1P32A | / | 交流 | 工業插座 (自備充電線) | Duosida |
| Mode 2 | Type 2 | Red CEE 3P16A | / | 交流 | 工業插座 (自備充電線) | |
| Mode 2 | Type 2 | Red CEE 3P32A | / | 交流 | 工業插座 (自備充電線) | Duosida |
| Mode 3 | Type 2 | Type 2 | / | 交流 | 用於一般中速充電 (自備充電線) | Duosida |
| Mode 3 | Type 2 | GB/T | / | 交流 | 中港車用於中國內地充電 (自備充電線) | Duosida |
| Mode 3 | Type 2 | / | Type 2 | 交流 | * 無需轉插 * 用於一般中速充電 (充電器已帶充電線) | / |
| Mode 3 | Type 2 | / | GB/T AC | 交流 | 中港車用於中國內地充電 (充電器已帶充電線) | Duosida |
| Mode 4 | CCS 2 | / | CCS 2 | 直流 | * 無需轉插 * 用於 Tesla 超充站或其他快充站充電 (充電器已帶充電線) | / |
| Mode 4 | CCS 2 | / | GB/T DC | 直流 | Model S/X 以外中港車用於中國內地快充站充電 (充電器已帶充電線) | Electway |
| Mode 4 | Type 2 DC | / | ChaDeMo | 直流 | 2020 年前 Model S/X 用於中電或港燈等快充站充電 (充電器已帶充電線) | Tesla |
| Mode 4 | Type 2 DC | / | CCS 2 | 直流 | 2020 年前 Model S/X 用於 Tesla v3 超充站或其他快充站充電 (充電器已帶充電線) | Tesla |
| Mode 4 | Type 2 DC | / | GB/T DC | 直流 | 2020 年前 Model S/X 中港車用於中國內地快充站充電 (充電器已帶充電線) | Tesla |
問題來了，到底咁樣充唔充到電？又會唔會燒咗個充電器/架車？
答案係唔得既！不過所幸既係咁樣插住條線亦都唔會傷及部車及充電器。
由於 Tesla Supercharger v3 全面轉用 CCS 2 插頭，如果你部 2019 年 4 月或之前生產既 Model S/X 未進行 CCS Combo 2 改裝既話，係不能夠使用 v3 充電機既。你需要支付 HK$2,250 進行改裝（由於價格浮動，最新價格請向 Tesla Service Centre 查詢），改裝完成後 Tesla 亦會包埋一個 CCS2 to Type 2 DC 轉接器畀你，用喺 v3 Supercharger 或其他 DC 快充充電機上。上圖車主似乎第一次遇到 v3 充電機，抱住 “插到 = 叉到” 既心態試吓⋯⋯
聰明既你應該可以見到，充電槍上既 CCS 2 插頭下面兩個窿其實並無駁到車主條藍色充電線上。而嗰兩個窿正正就係 DC+ 及 DC-，即電流正負極。上面部份既三個 Pins 分別係 Control Pilot (CP)、Protective Earth (PE) 及 Proximity Pilot (PP)，簡單黎講只係接地及訊號傳輸。由於充電機既電流根本無接落車度，所以係唔會對車及充電機造成任何損害既。
小編最近做咗好多充電相關既研究，有好多野想同大家分享。不過由於篇幅所限，講太多野怕會太混亂，所以呢篇文章暫時講住咁多先。希望呢篇文章大家仍然會睇得明，有機會再深入探討一下。如果大家都對呢類比較小眾、深入分析既文章有興趣，請多多支持，Like 我地既 Facebook Page 及多啲互相交流吓！
資料來源
The Different EV Charging Connector Types
Latest Update Allows Tesla Model S/Model X To Supercharge At Up To 225 kW
CHARGING MODES FOR ELECTRIC VEHICLES
Edward Chong
本人是2022 model y 新車主，部車會安排中港車，看完你的以上內容，是否可用跟車的充電綫對接大陸AC充電器的自帶綫之插頭嗎?
但如大陸AC機沒有自帶綫和插頭怎樣辨?我跟車的充電綫是不能用嗎?
如遇到公家的DC機我架車怎樣可以充到電?
有勞回復，謝謝你幫忙。
莊字
EVOffer Admin
莊生你好，回覆你以上幾個問題：
1. 跟車充電線用唔到喺大陸國標交流充電機
2. 如充電機自帶線，就用轉換頭；本身無自線就要用一條 Type 2 to GB/T 既線
3. DC 充唔到，如果需要用 DC 充電只可選 Model S/X
Benny
你好
我想問 如果買2019-2020年份既model 3 LR版
我係Tesla 官網睇到既 大陸轉換插頭 GB AC轉接器 係咪model 3都可以用到？
如果用到 係用大陸既快充定慢充？(我係小桔充電同星星充電app 只搵到超充、快充同慢充)
如大陸充電機無充電綫 type 2 to GB/T既充電綫可以邊度買？係咪支援慢充only ?
Ricky
2019年model 3 LR, 跟送的叉電線太短, 哪裏找一些較長的線呢?
EVOffer Admin
Model 3 原裝線應該係 4m，可考慮選購我地 5m 或 10m 長度既 Type 2 充電線