現時二手 Model S 車價約30-50萬，全新 Model 3 亦由33萬起，好多準車主會喺兩款車之間猶豫不決，到底應該點樣簡先最適合自己？各位不妨參考以下幾個Point簡一架適合自己既 Tesla!
你可唔可以自己安裝充電設備?
2017年1月之前訂購既 Model S 均可享有終身免費超級充電服務，但後來因為營運成本上升，超級充電已經成為逐次收費，截至2020年3月，現時收費為$3.1/kWh 。 如果你平時去開既地方（例如屋企或公司）可以自行安裝充電設備，當然無需考慮太多。但如果無既話，就要依賴公家既充電設備。喺呢個情況下，二手（帶永久免費超級充電）既 Model S 可能更為適合您。
你需唔需要更大既車箱空間？
好多人比較兩款車型時，都會以寶馬五系及三系作參考。Model S 車身大細貼近寶馬五系，而 Model 3 則近似寶馬三系。Model S 除咗座位會闊落少少之外，亦因為佢既 Hatchback 設計，令車尾既空間十分多，筆者甚至試過將一部 65 吋電視放入 Model S 尾箱。
你追唔追求新技術？
二手 Model S 始終係幾年前既設計，好多 Tesla 既新技術都無擺落 Model S，反而放咗落 Model 3 度。例如最新電池技術、藍芽手機車匙、隱藏式出風口、Autopilot 3.0 電腦、賽道模式、行車錄影等，Model 3 部電腦反應更加快過二手 Model S 幾倍。
好多現有 Model S 車主指，佢地部車現時續航力只係得返二百幾公里，相反 Model 3 受惠於車身輕、電池技術新等因素，續航力更長及耗電量更低，Long Range 或 Performance 版閒閒地行到 400 公里或以上。
