買新車慳稅流程全攻略

睇完呢篇 Model 3 平版貴版點樣揀 之後，相信你已經有咗目標，諗定買咩型號既 Model 3 啦。如果你連車都試埋，準備磅水買車，咁下一步應該要點做？

第一步：落訂

Tesla 唔同傳統車廠，並唔係由代理負責賣車，而係直接由香港分公司既 Sales Team 負責。其中一個最大既分別係你可以完全唔經 Sales 直接網上簡好 Config 落訂。

落訂方法有 2 個：

1. 經 Sales 落訂，雖然 Tesla 並唔係行佣金制，Sales 賣到車唔會分到佣金，但就係上面評估佢地表現既指標，所以佢地都會好落力建議客人經佢地訂車架！經 Sales 落訂其中一個好處係訂車後至交車前有咩事都可以搵返呢個 Sales 查詢，唔使打上 Hotline 等餐懵，但亦有聽聞過有 Sales 落訂後就失咗蹤，所以搵一個可靠既 Sales 都好重要！
2. 自己上網禁制，好處係快，隨時可以搞掂哂，不過就無人跟進你個訂單，要等到臨近收車先會有 Delivery Team 同事搵你跟進。

第二步：等運到

你無睇錯，我無講錯，真係等運到。好彩既話，你買到現貨車或最近比較多船有車到港，就可以好快交車。但有準車主反映 2020 年 2 月訂車都有機會要等到 7 – 8 月先交到車！呢一點就要視乎你訂車時有幾多人排隊，同埋有幾多車到港啦！

順帶一提，同時落訂，訂唔同配置收車都有機會唔同架！例如白色 Long Range 性價比較高，訂車人數多，條龍分分鐘排到 10 – 11 月先有車交（估架咋，未 Fact Check）！最大鑊係訂白籠 Performance，聽講出到車既數量一隻手數得哂，想快交車既朋友要避免揀白籠呀！有朋友白等半年最後都死死地氣轉黑籠。

第三步：安排交車

有船期後，Tesla 內部會跟據訂車順序安排交車，Delivery Team 就會按順序通知準車主安排文件及交車。呢個時候，準車主要準備以下三樣野：

1. 錢 (現金，上會或 P-Loan）
2. 保險
3. 一部劏車

上會或借 Loan 既程序呢度就唔多講，官方推薦用 Orix 上會，就算你係用其他人名義劏車，佢地亦都可以幫你安排到上會服務。詳情可以問返佢地，或等有經驗既車主補充。

保險方面，一般推薦跟返同 Tesla 合作緊既 Liberty 買新車全保，用其他人名義劏車既話，需要加約一千港元手續費，佢地會發出 2 份 Cover Note 比你出車及轉名時用。

至於劏車，有部份準車主一早已經準備咗一部合符「一換一」計劃既車準備用黎減稅。「一換一」計劃要求如下：

1. 在被拆毀而取消登記時必須已在香港首次登記最少6年
2. 緊接在「舊私家車」取消登記前，參加「一換一」計劃的車主必須是「舊私家車」的登記車主連續18個月或以上
3. 緊接在「舊私家車」取消登記前的12個月期間內須有最少10個月(即304天或以上)，連續或不連續皆可，領有有效車輛牌照。

唔係好明？可以睇下簡化版：

1. 要係私家車
2. 舊車喺香港登記至少 6 年（記住：海外登記過唔計！）
3. 舊車喺劏車前車主要持有呢部車連續 18 個月或以上
4. 舊車喺劏車前 12 個月內 要至少有 10 個月 （304 日）有牌費，無需連續持有

如果你唔肯定自己架車符唔符合條件既話，其實可以同運輸署確認架：

你可以親臨運輸署香港牌照事務處 (地址: 香港金鐘道95號統一中心3樓)、透過電郵 (地址: [email protected]) 或書面 (地址: 香港金鐘道95號統一中心3樓，行政主任/首次登記稅收啟) 向我們查詢，並請帶同/夾附你現有的私家車的車輛登記文件 (俗稱「牌簿」，需有登記車主簽署)的數碼相片或影印本。我們會向你提供現有的私家車的現時車齡（即由有關車輛在本港首次登記日而非製造日計算）、現時登記車主擁有車輛期間、及在最近12個月中已領牌期間，讓你知悉你現有的私家車是否符合參加「一換一」計劃的條件。

參加「一換一」計劃最多可以慳 $152,500！記得一定要用盡優惠唔好蝕！

如果你自己己經擁有一部可以扣稅既「準劏車」既話，你可以聯絡坊間劏車場報價及安排拖車。如果你無相熟劏車公司，又或者廢事煩，亦可以交比 Tesla 代為安排，當然佢地收車既價錢會差啲啦！

但如果你無車可劏既話，其實都有方法可以享用呢個優惠—買名額！

買名額既好處當然就係可以慳返近 15 萬稅啦，但當然要付出返少少錢去買個名額，同埋架車將會變成 1 首。現時巿面上名額收費大概 $15,000 – $20,000，視乎返當時交車情況，如果交車多，需求大，就可能會貴少少。相返好似今年 4 – 6 月無乜車交，個名額自然無咁值錢。

買名額唔使咁早買，收到 Delivery Team 通知前先搵都未遲。整個劏車程序一日就可以完成，之後將相應資料交去比 Tesla 佢地就會幫你安排之後既野，如無意外 2 至 3 星期後就可以攞車架喇！

Q: 買名額有咩要注意?
A: 為免爭執，一定要先確認賣家部車係符合一換一條件，最好就叫賣家向運輸署查詢，拎到證明，仲要簽埋合同，咁就萬無一失啦！

Q: 名額賣家要提供咩資料？
A: 賣家需要提供劏車紙、身份證（如公司持有就要 CI）、地址證明。另外運輸署亦有啲文件需要名額賣家簽名。

Q: 買賣名額原理係咩？
A: 喺運輸署角度黎講，整個購車程序都係名額賣家劏車、出車。所以真正享有免稅優惠既係名額賣家而唔係你。當新車落地後，登記人將會係名額賣家。因此Tesla 將牌簿交比你之後，你需要再去運輸署將架車轉返落自己名下（變成 1 手)。

第四步：收車

搞咗咁耐，終於可以收車！收車程序有機會再同大家分享，但如果用其他人名義出車既車主就需要去運輸署搞轉名手續，將架車轉返落自己名下。

希望呢篇文章幫到各位準車主！有咩疑問歡迎提出，我會整理一個 FAQ 幫大家解答疑難。