相信好多買咗 Tesla 既朋友都知道，其實 Tesla 係有內置 DashCam 功能，但又好奇怪地見到街上好多 Tesla 都有加裝車 Cam。究竟點解有內置 DashCam 都要裝多隻 Cam? 裝 Cam 又有咩選擇?
Tesla Dashcam 有咩功能?
首先我哋先簡單了解吓 Tesla 內置既 DashCam 功能。DashCam 功能係 Tesla 於 2018 年推出 Version 9 時新增既功能。要用到 Tesla Dashcam 功能，你架車需要有 AP2+ 同埋 MCU2+。換句話講，現時香港所有既 Model 3 同 Model Y 都有此功能。而 Model S 同 Model X，就需要有 AP2 (香港所有 Model X 同 2016 年底以後既 Model S) 同升級 MCU2 之後先會有呢個功能。
只要你有插到 USB Drive 落 Tesla 既 USB data port (2021 年底後只有首飾箱內 USB 係帶 Data Port)，就可以實現錄影功能。喺行車既時候 Tesla 係會 Keep 住循環錄影前後左右 4 個鏡頭 (MCU2 + AP2 為前左右三鏡頭，其他版本為前後左右四鏡頭)，USB Drive 位置用完會自動刪除最舊影片。如果行車時有需要另外儲存影片而不被刪除，可以響咹或按一下屏幕上既鏡頭圖案，咁 Tesla 就係幫你獨立儲存過去十分鐘既影片到特定既資料夾入面。
停低車輛之後，只要你開咗哨兵模式，當有人接近你架車時 Tesla 就會影低嗰段時間前後幾分鐘既片段。
而最開心既係，你唔駛將個 USB Drive 帶返屋企，可以直接喺車度睇返錄咗既片。
更開心既係，香港於 2022.36.2 更新之後，終於加咗 Sentry Live 功能，即係你可以經 Tesla App 即時睇到自己架車前後左右 4 個鏡頭既狀況。
講到咁正，咁點解啲人仲會選擇去加裝車 Cam?
Tesla 內置 Dashcam 不足之處
唔夠清
好多人之所以要加裝車 Cam，其實大部分都係嫌 Tesla 個車 Cam 唔夠清。Tesla 車 Cam 既解像度其實只有 1280 x 960。呢個係咩概念? 就係好過 DVD 品質 (720p) 少少，但又唔夠 1080p 咁高清。另外好多人投訴既係 Tesla Cam 錄出黎既片色水都唔係好啱。明明係一架紅色既車，放返條片出黎架車可以變左橙色。最大既問題係，個車 Cam 往往都唔夠清，好多時都睇唔到前面架車既車牌。
有斷點
Tesla 既車 Cam 片，係會每一分鐘斬開一條片。而喺片同片既中間，係會有一秒既空白。唔好睇少呢一秒，往往就係因為呢一秒，你就睇唔到你想睇嘅嘢。
勁食電
當你泊咗車之後，如果你想繼續錄片，就要開啟哨兵模式。而呢個哨兵模式真係幾大食，開咗佢啲電真係倒水咁，大約一個鐘會冇左 1.5 公里行程。一架 Model Y Long Range 叉滿電既情況下，大概錄 10 日片，你舊電就會跌到落 20% 左右。同傳統車 Cam 用大約 5W 既功秏相比，哨兵模式既功秏大既係 200-250W，係講緊 40-50 倍既用電量。
低電量時泊車唔會錄影
當你電量喺 20% 以下時，哨兵模式會自動關閉。即係如果你架車喺電量低既時候俾人 Hit & Run，你係冇仇報。
實時車 Cam 有限制
Tesla 新增既實時車 Cam 係好正，但係其實都有啲雞肋。除咗需要訂閱專享網路之外，實時車 Cam 仲有每日流量限制，就算你架車係長連 Wi-Fi 都冇用。而每日既流量限制係幾多? 大約係 10-15 分鐘左右。
如果以上既缺點對你黎講都唔係咩大問題，其實 Tesla 個 Dash Cam 都算好用。但如果你對於片既質素好高要求，又想停低車後可以錄影又唔想咁食電，咁你就真係要考慮下外加車 Cam 啦。
買車 Cam 邊種好?
香港黎講，大路都係買韓國牌子，例如 BlackVue、Thinkware 等。好處係畫面質數有保證，功能多，夠穩定。缺點當然係比較貴，同埋係唔係專車專用，前 Cam 點都會睇到少少明線。依家大陸既車 Cam 都越做越好，畫面都夠晒清，亦都會有專車專用既 Cam，前 Cam 係睇唔到走線。但當然，大陸 Cam 相對黎講唔夠穩定，喺太陽底下晒多幾晒，有可能會過熱錄唔到。另外，用得國貨，如果你車 Cam 要連網，都會有私隱外洩問題。
裝車 Cam 都有幾種裝法
就算你決定好買車 Cam，其實都要留意，唔同既裝法，都會影響到使用體驗同價錢。
駁匙火，泊車唔錄
最簡單既安裝方法，基本上就係從點煙器取電，駁匙火。所謂既匙火，即係泊低車後車 Cam 就會斷電，唔會繼續運作，直到你下次上車先會重新啟動。而 Tesla 既所謂匙火都有兩種。一種係熄左 Mon 就斷電，另一種係架車休眠後先斷電 (通常泊低車後 5-15 分鐘後車就會休眠)。而有人會去開哨兵模式去防止架車休眠，從而達至長火功能 (不過勁食電)。
駁匙火，加尿袋
呢種安裝方法比較大路。選擇呢種安裝方法既人，通常係想泊車後都照樣錄到影。呢種安裝方法係傳統汽油車既安裝方法，因為傳統汽油車依賴 12V 電供電俾車 Cam。如果駁長火 (意思係唔會取電既地方唔會斷電)，個車 Cam 就會扯乾舊 12V 電。泊一晚車，第二日你就躂唔著架車。所以解決既方法，往往就係用匙火，再加個 12V 尿袋，當你渣緊車時就會將個尿袋充電，而泊車後就會用尿袋既電供車 Cam 用。呢個安裝方法最大缺點就係貴。一個尿袋既價錢基本上係 2000 幾蚊，大大增加左裝 Cam 既成本。而另一個缺點係，尿袋需要時間充電。以 BlackVue 既尿袋為例，揸 80 分鐘可以充滿電池，並喺停車後繼續運行 24 小時。如果你揸車時間好短而停車時間相對長既話，其實都達唔到車 Cam 長時間運作既效果。
駁長火
最後講既呢種方法就係駁長火。呢種安裝方法礙於出面既人對電動車認識唔夠深，所以好少人會咁樣裝。由於 Tesla 喺停咗車後都有 DC-DC 轉換器由大電保持 12V 電既電量，所以車 Cam 駁長火係唔會扯乾 12V 電 (除非你大電都冇晒電)。當然，Tesla 駁長火亦都需要一啲技巧，唔係話隨便接去 12V 電就得。呢個方法既好處係唔駛額外加個尿袋，又可以達致泊車後車 Cam 可以繼續以停車模式運作。
廣告時間
我地 EVOffer HK 都有提供車 CAM 安裝服務，車主可以因應唔同需要選擇唔同既安裝方法。如果你需要安裝車 CAM 服務，只需要向本店職員出示本文截圖，即可享有九折優惠（優惠期至 2022 年 11 月 30 日）！
[ux_products type=”row” show_cat=”0″ show_rating=”0″ show_add_to_cart=”0″ show_quick_view=”0″ cat=”190″ products=”16″ orderby=”title” order=”asc”]
