淺談 Tesla 車聯網

眾所周之，自 Model S 開始每部 Tesla 均配備 3G / 4G 網絡連線功能。今日想分享一下呢套網絡系統背後既運作。

配備上網功能既 Tesla，除咗可以用黎睇地圖、聽音樂等功能之外，隨時用手機連接都係一大亮點。
透過網絡實現既功能包括：

即時交通實況
導航路線
串流音樂 (Spotify / Tidal)
行事曆同步 (香港只開放部份功能)
瀏覽器 (香港未開放)
串流影片 (YouTube / Netflix, 香港未開放)
手機控制 (溫度、解鎖等)
智慧召喚 (香港未開放)

自 2019 年起，Tesla 推出尊享網絡，將部份網絡功能收費，例如即時交通實況、音樂串流等。好多人誤會唔畀錢會連手機 APP 都用唔到，其實只係部份功能用唔到，依然可以用手機連接同控制車輛。
Tesla 於世界各地同唔同網絡供應商合作，例如喺香港就同過三間供應商合作過，為汽車提供互聯網服務。最初 Tesla HK 與 1010 合作提供服務，後來換成 Smartone，近年有傳 CMHK 亦有為 Tesla HK 提供服務。

咦，咁 Tesla 係唔係其實有張 SIM 卡喺架車度架？

啱一半啦！喺早期配備 MCU1 既 Model S/X 上，Tesla 係將一個 SIM 讀卡器收喺中控屏幕下方，入面的確係有一張 full size 既 SIM 卡。及後去到 2019 年 Model 3 仍然係採用實體 SIM 卡。據悉，Tesla HK 喺大概 2020 年左右轉用 eSIM，雖然新款 Model 3/Y 電腦仍然有 SIM 卡槽，但就透過軟件禁用，不含 SIM 卡。
針對唔同地方網絡頻段不一，Tesla 巧妙地將網卡獨立設計，可以喺唔同地區既行車電腦上裝配唔同既網卡。已知目前Model 3/Y 上有四款唔同既版本供畀北美、歐洲及亞洲、中國既車輛。四款網卡都係採用由 Telit 供應既 LE940B6 系列。

車主謎思：到底架車喺休眠時打開手機 APP 點樣喚醒部車？

為咗保持低功耗，Tesla 行車電腦唔會長期保持開啟，反而會喺車主離開車輛後一段時間進入休眠模式。透過 Wake on LAN 技術，喺車輛休眠後，如果車主打開手機 APP，伺服器就會發送一個 SMS 去車內 SIM 卡既電話號碼，啟動行車電腦，從而令車主順利控制車上各個功能。
曾經有車主問過可唔可以換 SIM 卡，如果架車係行實體 SIM 既話，其實係可行既，不過功能性上就有機會差啲。首先，因為Tesla 未必有新 SIM 既 APN 等資料，所以插入 SIM 卡後未必能夠正常運作，要進入 TDS Mode 先可以進行設定。至於行緊 eSim 或 Model 3/Y 就更麻煩，需要用到原廠維修軟件先可以修改到相關設置。其次，因為 Tesla 無呢張第三方 SIM 卡既資料，因此當要喚醒架車時，未能準確地發送 SMS 去你架車，導致喚醒失敗。