Tesla 除咗軟件更新之外，其實仲有導航資料更新及遊戲資料更新架！好多車友未必知道，其實導航資料係獨立出黎，可以無需重啟 MCU 下自行更新，甚至唔少車友不知不覺間原來已經更新咗！到底地圖/導航背後點樣運作？呢篇文章為你詳細講解！
香港對上一次更新係 2019 年底，再上一個更新更加遠至 2016年第三季！Tesla 既 Firmware 及 Navigation 資料係分開既。Firmware 係全球通用，而 Navigation 就係每個國家/地區獨立，不可通用。渣住架香港導航資料包既車，去到英國係連導航都用唔到架！
全球劃分為不同地圖地區，包括北美(NA)、歐洲(EU)、東南亞(EA)、中東(ME)、中國(CN)、香港(HK)、澳門(MO)、台灣(TW)等。（係呀，香港、澳門同台灣都各自有其獨立既導航資料包，幾威威，方便閹哂啲功能丫嘛，好似係）導航資料包包含資訊十分豐富，整套 Full Self-driving 亦十分依賴佢提供既資料，例如轉彎路口、指揮燈、切換公路等資訊，全部都儲存喺呢個小小既導航資料包內。
講返個地圖，大家以為 Tesla 係用 Google Map? 啱一半啦！其實完整既車載地圖分為 Frontend (地圖)及 Backend (導航資料)。大家睇到既地圖資訊除咗中國以外，全部 Frontend 均由 Google 提供。而背後計算就靠另一套系統。 （所以你喺地圖明明見到屯赤隧道，但永遠都導航唔到） 2017 年，Tesla 將其背後既導航系統由 Navigon 切換至 Mapbox + Valhalla，以便佢地將更多 Autopilot 所需資訊塞入去。
講咗咁耐，點樣更新？地圖更新並唔係想有就有，要靠 Tesla 推送。至今仍有部份 Model S/X 停留喺 2016 年 既 Navigon 系統，有部份更突然出現”導航需要更新”等字句但又更新唔到。除咗靠官方推送之外，如果 OTA 失敗咗，就只能入廠由廠方直接用手指將地圖資料抄入車內進行更新。
Facebook 相關帖文：https://www.facebook.com/teslatalkhk/posts/1661130650754161
