Model 3 避震改裝入門 101

首先感謝車友 “7公” 分享關於避震相關既資訊，以下內容由 “7公” 負責編寫，Warren 稍作修訂。

月經問題，好多車友嫌架車好扽，想知換咩避震舒服啲。

如果你覺得原裝避震太扽唔岩坐，其實有幾個方法可以試吓。呢篇文章將會由平至貴，由淺入深（個坑），同大家介紹唔同改善問題既方法。方法豐儉由人，由唔使錢到好貴都有，大家可以睇餸食飯！

利申：舒服同岩坐係好主觀，如果踩中你用緊個套就講聲唔好意思先！我已經試用過三套避震，由彈弓到 1-way 到 2-way 都有玩過，希望少少經驗及心得可以分享畀大家。

呢篇文將會涵蓋以下幾個範籌（由淺入深）：

1. 改變軚壓
2. 只換彈弓
3. 更換整套避震

改變軚壓

軚壓可以影響架車既舒適程度，軚壓越大理論上係會越扽，但並唔代表軚壓越低越好。零成本既方法就係透過調較軚壓提升舒適度。

原廠建議 Model 3 軚壓約為 42 PSI，車主可以以每 2-3 PSI 為一個區間，逐格向下試。要注意既係軚壓喺行使一段時間後會上升，俗稱熱軚，量度出黎既數字有可能會唔同（熱軚通常比凍軚高 2-3 PSI），建議車主喺同一狀態下量度。例如喺停車場泊咗一晚之後先去量度凍軚度數，再作調整及試車輛舒適度。

比少少參考資料大家：一架 2,000 kg 既七人車配置 18″ 鈴係打大概 35 PSI 左右，而 Model 3 淨重約為 1,600 – 1,800 kg，可以試到啱心水後再喺車內重置軚壓感應，就唔會出現軚壓過低既提示。

好處：

• 唔使錢
• 即時有效果
• 唔影響保養

壞處：

• 軚壓越低，條胎越快行哂
• 軚壓太低亦會出現兩側蝕得比中心快，同時出現浮水效應

只換彈弓

彈弓係入門之選，一般 Budget 大概係 $5,000 左右（包含安裝）。巿場上有好多選擇，例如：

• Eibach
• H&R
• RSR
• Swift
• T-Sportline
• Unplugged Performance

彈弓硬度 (Spring Rate) 單位係 kg/mm，假設一條彈弓硬度係 8K，即代表每 8kg 既力就可以壓縮 1mm 既行程。彈弓伸展性係線性既，所以 16kg 既力就可壓縮 2mm，如此類推。簡單黎講，K 數越大，硬度越高。

彈弓可以分為兩種：Linear 及 Progressive。Linear 係整條彈弓由開始到完結都係同一個硬度，不論條彈弓縮到幾短，硬度基本上都係一樣。而 Progressive 則初段硬度比較低，壓縮後段相對提高。每間彈弓廠都有自己設計既 curve，就好似係佢地自己既獨門配方咁，唔會對外公開。值得一提既係有部分廠會用 “Dual Rate” 呢個 Term，即係條彈弓只有兩個rate。例如 [1 段 5K / 2 段 8K] 代表彈弓初段硬度為 5K、後段硬度為 8K。但去到邊個位先係 8K？唔知架！因為係「商業秘密」！

高硬度既彈弓係比較 Sport-oriented，快嗰陣車身會比較穩定，相對慢車時就會跟路面起伏而上落（即係一般叫扽）。個原理係因為［車重+車速］未能令彈弓壓縮，吸震筒 (damper) 未有工作，所有路震就幾乎全數比番架車，之後比晒你太太，之後你太太再由把口比番晒你。

小弟我坐過咁多款唔同彈弓既 Model 3，有以下感想：

T-Sportline 最平衡同時比原裝軟身；Eibach 比較硬/企；Eibach 同 Unplugged Performance 都有 progressive 既設計，係香港路面可以話係完全唔好用。當行緊 50km/h 路段時都還可以，去到 70km/h + 既爛路（例如龍翔道、赤柱等）就隔夜飯都嘔埋出黎。

利申：我自己有用過 Unplugged Moderate (Drop 1.5″)，阿女真係嘔左幾次…

更換彈弓後通常車身都會相應調低，多數 Drop 0.7″ 至 1.5″，係香港 Drop 1.5″ 會有好多地方都浪底，所以個人建議 Drop 1″ 比較安全。

好處：

• 價錢相宜，平價之選
• 有埋 Low 低效果，外型加分！

壞處：

• 高度唔可以調整
• 如果 Low 得太低會浪底，同時避震條芯有機會跟唔到，反而會再扽啲
• 影響保養

更換整套彈弓避震

套裝避震大致可以分為兩類：1-way 及 2-way

• 1-way 代表該套避震只可以調較 1 個設定，多數只係 Rebound Only
• 2-way 代表該套避震可以調較 2 個設定，分別係 Rebound 及 Compression (Bump)

有部分 1-way 避震係一個掣可以同時調較 Rebound 同 Compression，不過個比例係由廠方設定，唔可以自由調節。

Unplugged Performance 其實有一套避震係 3-way，但由於呢套係比 Racing 用，而且個入門設定都唔太啱係街行，所以就唔多講解。

套裝避震既選擇比單純換彈弓更多，部份品牌更有多於一款配置可供選擇，價錢由 $9,000 至 $30,000 以上不等。香港較為普遍既品牌包括：

• AGT
• eXtend R
• KW
• Mountain Pass Performance (MPP)
• Redwood Motorsports (用 Ohlins 機芯) 
• RSR
• Triple S
• Unplugged Performance
• YCW

前文提到，有部分避震廠會推出多於一款 Model，唔同廠有唔同既命名方式，主要分為Comfort 同埋 Sport。簡單黎講，如果覺得原裝大扽，就只可以揀 Comfort 既避震；唔夠做既話就揀 Sport。

一般黎講， Comfort 同 Sport 係有 Overlap 既設定。例如 MPP 既 Comfort 同 Sport 有大約25% off shift – 即係 Sport 最軟既 Setting 就係 Comfort 25% 既效能。至於 Redwood Ohlins 既 GT 同 Sport 就大約有 30 – 35% 差異（利申：條數只係用網上資料約數計出）

 好處：

• 高低軟硬都可以調較
• 如果有安裝包圍，可以因應需要微調吓，避免入停車場時刮底

壞處：

• 價格相對比較高昂
• 影響保養

坊間有部份車房會做 Custom Setting，如果一心只係想坐得軟身舒適，唔會激烈駕駛既話可以考慮下，暫時已知 Oscar Pro 及 KH Auto 都有提供相關服務。

因為街買到既避震 Preset Setting 都係偏硬，採用既彈弓由 8K 至 12K 都有。正如前文所講，K 數愈高，理論上架車就會愈扽/跳。目前出廠低過 8K 既避震選擇暫時已知只有 MPP Comfort 同 Redwood Ohlins GT。

總結

由於感覺係好主觀，如果真係想深入了解同試坐唔同避震既舒適度，可以出席不定期舉行既車聚活動，搵已經安裝咗唔同避震既師兄交流及試坐一下，收集資料後再課金都未遲！

最後，不論你揀咩避震，用咩 Setting 都好，後排一定係不及前排咁舒服。例如行車時覺得架車有少少搖，後排乘客既感覺一定係會比前座搖得勁啲既。

以上只係個人心得同以舒適為本，小弟唔係專業人仕，如有任何錯漏多多包含，歡迎提出唔同意見及補充資料比大家參考吓！